Reykjavíkurborg tekur við heimahjúkrun af ríkinu

Guðlaugur Þór Þórðarson, heilbrigðisráðherra, og Hanna Birna Kristjánsdóttir, borgarstjóri í Reykjavík, undirrituðu í dag samning um að flytja rekstur Miðstöðvar heimahjúkrunar höfuðborgarsvæðisins frá ríkinu til borgarinnar.

Þetta kemur fram í tilkynningu frá heilbrigðisráðuneytinu. Þar segir einnig að með þjónustusamningnum hefjist tilraunarverkefni til þriggja ára sem felst í að reka heimahjúkrun og sameina hana rekstri félagslegrar heimaþjónustu í Reykjavík.

„Þannig verður til þjónustukerfi, sem myndar eina heild gagnvart notanda og er markmiðið að gera fleiri íbúum kleift að búa heima þrátt fyrir öldrun, fötlun, veikindi eða skerta getu til daglegra athafna. Með því að sameina og samþætta starfsemina er stefnt að því ná fram bættri nýtingu mannafla og fjármuna," segir í tilkynningunni.

Samningurinn er til þriggja ára og gildir frá 1. janúar 2009 til 31. desember 2011 og greiðir ríkið alls rúmlega 2,8 milljarða króna fyrir þjónustu Reykjavíkurborgar á samningstímanum. Skiptist fjárhæðin svona:

Á árinu 2009 greiðast 892 milljónir króna, á árinu 2010 greiðast 942 milljónir króna, á árinu 2011 greiðast 992 milljónir króna. Á árinu 2009 er gert ráð fyrir að verja 892 milljónum til heimahjúkrunar og 1037 milljónum til félagslegrar heimaþjónustu. Samtals tæpum tveimur milljörðum króna.

344 starfsmenn sinna í félagslegri heimaþjónustu, 115 í heimahjúkrun, samtals 459 starfsmenn. Um 3000 heimili njóta nú félagslegrar heimaþjónustu og um 1000 heimili njóta heimahjúkrunar að jafnaði. Alls hafa á þessu ári 2200 einstaklingar notið þjónustu heimahjúkrunar og um 3700 heimili notið félagslegrar heimaþjónustu. Árlegar vitjanir sjúkraliða og hjúkrunarfræðinga voru rúmlega 156 þúsund. Um 87% beiðna um heimahjúkrun koma frá Landspítala háskólasjúkrahúsi og heilsugæslu höfuðborgarsvæðisins.

Heildarupphæð samnings um heimahjúkrun til þriggja ára er 2,8 milljarðar króna. Fé til félagslegrar heimaþjónustu verður á sama tímabili um 3,3 milljarðar króna. Samtals um 6,1 milljarður á næstu þremur árum.

Samkvæmt ákvæðum þjónustusamningsins sér Reykjavíkurborg um rekstur heimahjúkrunar í Reykjavík allan sólarhringinn alla daga ársins. Þar fyrir utan tekur samningurinn til reksturs heimahjúkrunar allan sólarhringinn alla daga ársins í Seltjarnarnesbæ, reksturs kvöld, - nætur og helgidagaþjónustu heimahjúkrunar í Mosfellsbæ að hluta og rekstur næturþjónustu heimahjúkrunar í Kópavogi, Garðabæ og Hafnarfirði.

Heimahjúkrun fá einstaklingar sem búa í sveitarfélögunum sem hér eru nefnd eða dvelja um lengri eða skemmri tíma í heimahúsi á svæðinu, t.d. í tengslum við dvöl á sjúkrahúsi eða endurhæfingu, og þurfa á heimahjúkrun að halda að mati læknis eða hjúkrunarfræðings.