Naumt hjá United - Arsenal tapaði fyrir Stoke

Mikið fjör var í leikjum toppliðanna í ensku úrvalsdeildinni í dag. Manchester United vann 4-3 sigur á spútnikliði Hull, Chelsea valtaði yfir Sunderland 5-0 og Arsenal tapaði 2-1 fyrir Stoke.

Allt stefndi í að Manchester United myndi vinna stórsigur á Hull í dag en annað kom á daginn. Ronaldo kom United yfir í leiknum en Daniel Cousin jafnaði fyrir gestina. Michael Carrick, Ronaldo og Nemanja Vidic komu United svo í 4-1 og leikurinn virtist vera í höfn.

Hull hefur komið allra liða mest á óvart í vetur og liðið náði að minnka muninn í 4-3 og hrella meistarana með mörkum frá Mendy og Geovanni. Sigur United var þó verðskuldaður og er liðið komið í þriðja sæti eftir sigurinn. Þetta er í fyrsta skipti á leiktíðinni sem Hull tapar tveimur leikjum í röð.

Ógæfa Arsenal heldur áfram gegn minni spámönnum deildarinnar og í dag tapaði liðið 2-1 fyrir Stoke á útivelli. Rocardo Fuller og Seyi Olofinjana skoruðu mörk Stoke sem bæði komu upp úr löngum innköstum hins ótrúlega Rory Delap.

Gael Clichy minnkaði muninn fyrir Arsenal en varamaðurinn Robin van Persie lét reka sig af velli hjá Arsenal fyrir kjánaskap. Arsene Wenger gerði breytinar á sínu liði til að bregðast við hörku Stoke manna, en þær skiluðu sér ekki.

Chelsea valtaði yfir Sunderland 5-0 þar sem Nicolas Anelka skoraði þrennu fyrir Chelsea og þeir Alex og Frank Lampard skoruðu mörk Lundúnaliðsins. Frank Lampard skoraði sitt 100. deildarmark fyrir Chelsea í leiknum.

Wigan vann 2-1 útisigur á Portsmouth þar sem Emile Heskey skoraði sigurmarkið í blálokin, en það var hans 100. mark í deildinni á ferlinum. Amr Zaki kom Wigan yfir úr víti en Niko Kranjcar jafnaði fyrir Portsmouth. Tony Adams er því enn að bíða eftir sínu fyrsta stigi sem stjóri, en hans menn áttu fimm skot í tréverkið í leiknum.

West Brom og Blackburn skildu jöfn 2-2 þar sem Roman Bednar og Ishmael Miller skoruðu mörk heimamanna í West Brom en Benny McCarthy og Keith Andrews skoruðu mark gestanna. McCarthy fékk reyndar að líta rauða spjaldið eftir rúmlega hálftíma leik eftir að hafa komið Blackburn yfir í leiknum.

Loks gerðu Middlesbrough og West Ham jafntefli 1-1 þar sem Hayden Mullins kom West Ham yfir á 21. mínútu en Hossam Mido jafnaði undir lokin.

Mörk og markaskorarar dagsins

Staðan í deildinni