Ronaldinho hefur neitað City

Adriano Galliani, varaforseti AC Milan, fullyrðir að Brasilíumaðurinn Ronaldinho hjá Barcelona hafi neitað umleitunum Manchester City og muni þess í stað ganga í raðir Milan í sumar.

Hann segir jafnframt að það sé tilgangslaust fyrir Milan að eiga fund með forráðamönnum Arsenal í þeim tilgangi að reyna að kaupa framherjann Emmanuel Adebayor.

Manchester City hefur verið orðað nokkuð við brasilíska snillinginn í sumar, en bróðir Ronaldinho hefur sagt að það sé um 90% öruggt að leikmaðurinn endi í Mílanó.

"Ronaldinho er þegar búinn að neita Manchester City, en félagið bauð honum samt helmingi hærri laun en við buðum honum. Það kæmi til greina að fá hann að láni, en hann er ekki inni í framtíðaráformum þjálfara síns hjá Barcelona svo það er ekki víst að hann verði of dýr," sagði Galliani.

"Hvað Adebayor varðar, er tilgangslaust fyrir mig að funda með Arsenal, því félagið vill fá allt of mikið fyrir hann," sagði varaforsetinn, en því hefur verið haldið fram að Arsenal vilji fá meira en 35 milljónir punda fyrir framherjann.