Kvótalausi sjómaðurinn fór í útrás með kvótagróða

Ásmundur Jóhannsson, kvótalausi sjómaðurinn, hefur ekki alltaf verið kvótalaus. Árið 1990 hagnaðist hann um sextíu millljónir króna þegar hann seldi hlut sinn í útgerðarfélaginu Festi, þar með talinn kvóta.

Eftir að Ásmundur seldi hlut sinn fór hann til Amsterdam þar sem hann stofnaði verslunarfélag. Þaðan fór hann til Brasilíu þar sem hann dvaldi í hálft ár og ætlaði í útgerð. Af því varð ekki en Ásmundur fór þá til Mexíkó þar sem hann dvaldi í fimm ár og reisti gúanóverksmiðju. Hann sneri aftur til Íslands árið 1999.

Undanfarið hefur Ásmundur gert út frá Sandgerði án kvóta. Hann hefur með veiðunum viljað vekja athygli á kvótakerfinu, sem hann kallar ólög. Fyrr í dag færði Landhelgisgæslan bát Ásmunds til hafnar og innsiglaði, og á hann yfir höfði sér kæru fyrir veiðarnar.

Aðspurður segir Ásmundur sér ekki þykja það skjóta skökku við að selja kvótann fyrst og mótmæla kerfinu svo. „Ég hagnaðist ekki á sölunni á kvótanum," segir Ásmundur, sem segist einungis hafa selt á verði sem miðaðist við tryggingamat skipsins. Öðrum viðmælendum Vísis virðist þó bera saman um að meginþorri verðmætis skipsins hafi verið kvóti.

Ásmundur fagnar yfirvofandi kæru vegna veiðanna. Málið sé nú í höndum lögfræðinga, en hann vill að það fari fyrir mannréttindadómstól. „Ég vil að ráðamenn fari að haga sér eins og menn og afnemi þessa kvótavitleysu," segir Ásmundur.