Leikritið Pabbinn verður að kvikmynd

Sagafilm og Bjarni Haukur Þórsson skrifuðu undir samning í gær um kaup Sagafilm á kvikmyndaréttinum á leikverkinu PABBINN eftir Bjarna Hauk. Stefnt er að því að kvikmyndin verði tekinn upp í byrjun árs 2009 í Reykjavík. Bjarni Haukur mun sjálfur skrifa kvikmyndahandritið en Bjarni hefur skrifað og leikstýrt yfir 60 gamanþáttum "sitcom" fyrir TV2 í Noregi og TV4 í Svíþjóð. Samninginn fyrir hönd Sagafilm gerðu þeir Magnús Viðar Sigurðsson og Kristinn Þórðarson.

Kvikmyndin PABBINN er byggð á samnefndu gamanleikriti eftir Bjarna Hauk Þórsson. Leikritið var frumsýnt í Reykjavík í Janúar 2007 og fékk feiki góða dóma og hefur verið sýnt yfir 90 sinnum fyrir fullu húsi. Leikverkið hefur nú þegar verið selt til Þýskalands, Svíþjóðar, Finlands, Noregs, Danmerkur og Lettlands, en mörg önnur lönd hafa falast eftir réttinum. "Pabbinn" er gamansöm hugleiðing um föðurhlutverkið og segir frá upplifunum ungs manns af meðgöngunni, fæðingunni og fyrstu skrefunum. Verkið er bæði drepfyndið og hjartnæmt. Sýningar á leikverkinu halda áfram í Íslensku óperunni frá 14. Febrúar nk.