Lampard er á Ítalíu

Frank Lampard, miðjumaður Chelsea, hefur verið sterklega orðaður við Inter í sumar og einhverjir fjölmiðlar hafa fullyrt að hann sé á leið í ítalska liðið. Lampard er nú staddur á Ítalíu.

Hann segir þó að þessi dvöl sín á Ítalíu tengist ekki hugsanlegum félagaskiptum í Inter. Hann sé aðeins með fjölskyldu sinni í sumarfríi.

Hann sagði þó við fjölmiðla að Ítalía væri frábært land og vildi ekkert tjá sig um framtíðina.

„Inter? Bíðum og sjáum. Ég veit ekkert um mína framtíð hjá Chelsea, það er ekkert komið í ljós," sagði Lampard.

Fleiri leikmenn Chelsea eru orðaðir við önnur lið. Það gæti farið svo að varnarmaðurinn Ricardo Carvalho sé á förum. Brasilíski varnarmaðurinn Alcides er kominn aftur til Chelsea eftir lánsdvöl hjá PSV Eindhoven.

„PSV vildi hafa mig áfram en Chelsea vildi að ég kæmi til baka. Það er útlit fyrir að Carvalho sé á förum og ég á að fylla hans skarð," sagði Alcides.