Stefán Logi: Algert óviljaverk

Stefán Logi Magnússon segir að Vjekoslav Svadumovic hafi ekki brotið á sér með ásetningi í leik KR og ÍA í gær.

Garðar Örn Hinriksson dómari dæmdi hins vegar brot og gaf Svadumovic gult spjald fyrir. Hann mótmælti og Garðar gaf honum þá aftur gult og þar með rautt.

„Ég er nýbúinn að slíta liðbönd og þess vegna blótaði ég. En að öðru leyti sagði ég ekki orð," sagði Stefán. „Þarna átti sér snerting stað. Hann steig ofan á vinstri löppina mína þegar ég stend í hana. Það er þó algjört óviljaverk og enginn illur ásetningur sem bjó þar að baki. Þetta var samt mjög vont."

„En ég missti boltann of langt frá mér sem bauð upp á þetta," bætti Stefán Logi. „En ég þekki þennan strák ekki að öðru en að vera mjög heiðarlegur."

„Svona er fótboltinn bara. Maður hefur séð mun verri brot sem hefur ekki verið dæmt á."