Wenger hefur trú á Adams

Arsene Wenger segist hafa trú á því að Tony Adams eigi eftir að spjara sig sem knattspyrnustjóri í ensku úrvalsdeildinni. Adams var ráðinn stjóri Portsmouth í dag og tekur við af Harry Redknapp.

Adams spilaði lengi undir stjórn Wenger þegar hann var fyrirliði Arsenal á sínum tíma og Wenger efast ekki um að hann hafi það sem til þarf í stjórastarfinu.

"Hann er kominn með aldur fyrir starfið, er með góðan hóp og ég held að hann sé tilbúinn. Tony hefur mikla reynslu því hann hefur starfað erlendis líka. Ég hef trú á honum og því er ég jákvæður á þetta," sagð Wenger.

Hann bætti við að Adams væri sterkur persónuleiki og það ætti eftir að hjálpa honum í starfinu. Adams átti í vandræðum með áfengi þegar hann var leikmaður en viðurkenndi erfiðleika sína og sneri lífi sínu á rétta braut.

"Ég trúi því að gáfur og skapgerð komi mönnum til bjargar þegar þeir lenda í erfiðleikum og það er það sem Tony gerði. Hann viðurkenndi að hann ætti í vandræðum með áfengi og sýndi styrk og skapgerð til að breyta því," sagði Wenger í samtali við Sky.