Illa komið fram við Barry

Martin Laursen segir að Gareth Barry sé sár yfir því hvernig Aston Villa kemur fram við hann eftir ellefu ára veru hjá félaginu.

Barry vill fara til Liverpool og Villa hefur sagt honum að halda sig frá félagssvæðinu meðan gengið er frá sölunni.

„Ég er búinn að ræða málin við hann og það fer ekki á milli mála að hann er mjög óánægður með stöðu mála. Honum líður ekki vel og það er sorglegt að sjá mann sem hefur gert svo mikið fyrir félagið í þessari stöðu," sagði Laursen.

„Gareth ræður alveg hvað hann gerir. Hann má gera það sem hann vill og telur vera best fyrir feril sinn. Ég hef spilað í Meistaradeildinni og það er magnað. Ég vona bara að hann verði ánægður hvert sem hann fer."

Laursen segir þó að það verði líf eftir Barry hjá Aston Villa. „Hann hefur verið frábær fyrir liðið síðustu ár og mikill missir þegar hann er farinn. Hann er frábær leikmaður, toppgaur og góður fyrirliði. Það eru samt alveg fleiri leikmenn í heiminum sem geta gert góða hluti," sagði Laursen.