Óttast að Joey Barton stytti sér aldur

Sam Allardyce, fyrrum knattspyrnustjóri Newcastle, segist óttast að Joey Barton stytti sér aldur ef hann verði látinn fara frá félaginu í vegna vandamála hans utan vallar.

Barton situr nú af sér sex mánaða fangelsisdóm fyrir að ráðast á ungling fyrir utan McDonalds-stað í Liverpool, en hann viðurkenndi á dögunum sekt sína eftir að hafa ráðist á fyrrum liðsfélaga sinn á æfingasvæði Manchester City.

Allardyce, sem keypti Barton til Newcastle síðasta sumar, segir að allt gæti siglt endanlega í óefni hjá leikmanninum ef hann verði leystur undan samningi.

"Ef Newcastle lætur Joey fara, verður það bara enn ein refsingin fyrir mann sem er að reyna að ná tökum á lífi sínu. Það gæti reynst hættulegt að taka frá honum fótboltann, því knattspyrnan er líf hans og yndi. Ef þú tekur boltann frá honum, gæti það einfaldlega sökkt honum í þunglyndi og við þekkjum dæmi þess að menn hafi framið sjálfsmorð eftir að hafa verið kippt út úr boltanum," sagði Allardyce og minntist fyrrum félaga síns Dave Clement í samtali við News of the World.

"Dave var með mér hjá Bolton og hann var aðeins 34 ára þegar hann stytti sér aldur. Það er ótrúlega dapurt þegar svona gerist og við megum ekki halda að það geti ekki gerst aftur," sagði Allardyce, en mál Clement vakti óhug árið 1982 þegar hann framdi sjálfsmorð með því að taka inn eitur.

Allardyce vill að Newcastle gefi Barton annað tækifæri.

"Það voru aldrei vandamál með Joey þegar hann var hjá mér. Það var bara þegar hann fór til Liverpool og var að drekka. Newcastle er síðasta tækifæri Joey til að koma sér á beinu brautina. Ég hugsa að taki enginn við honum ef hann nýtir ekki þetta tækifæri. Ef hann snýr lífi sínu ekki við núna - mun hann líklega aldrei gera það," sagði Allardyce.