Segir hundrað mótmælendur hafa gefið sig fram

Varahéraðsstjóri kínverskra stjórnvalda í Tíbet greindi frá því í dag að um hundrað manns hefðu gefið sig fram við stjórnvöld og viðurkennt að hafa tekið þátt í mótmælum í landinu undanfarna dag.

Í kínverska ríkissjónvarpinu hélt hann því fram að fólkið hefði viðurkennt íkveikjur, þjófnaði og skemmdarverk. Þá var einnig greint frá því að handtökuskipanir hefðu gefnar út á hendur fleira fólki sem grunað er um aðild að óeirðunum.

Kínversk stjórnvöld höfðu gefið mótmælendum frest til miðnættis í gær til að gefa sig fram ella hljóta harðari refsingu fyrir aðild sína að mótmælunum ef þeir næðust. Fjöldi fólks hefur látist í mótmælum í Lhasa undanfarna daga en mótmælendur berjast fyrir sjálfstæði Tíbets.