Samkomulag um ríkisstjórn í Belgíu

Samkomulag hefur náðst um myndun ríkisstjórnar í Belgíu eftir níu mánaða stjónarkreppu í landinu.

Frá þessu greindi Yves Leterme, leiðtogi Kristlegra demókrata í Flæmingjalandi. Fimm flokkar standa að hinni nýju ríkisstjórn og fer Leterme fyrir henni enda sigraði flokkur hans í þingkosningum í júní í fyrra. Meðal þess sem ný ríkisstjórn lofar er harðari stefna í innflytjendamálum, lægri skattar og hærri lífeyrisgreiðslur.

Stjórnarkreppan í Belgíu hefur verið mikil og leit út fyrir á tímabili að landið milli klofna í ríki Flæmingja og Vallóna. Flæmingjar tala hollensku og eru um 60 prósent af íbúum landsins en allónar tala frönsku og eru um 40 prósent.

Meðal aðila að ríkisstjórninni eru frjálslyndir demókratar, flokkur Gys Verhofstadts, fráfarandi forsætisráðherra, sem stýrt hefur bráðabirgðaríkisstjórn að beiðni Alberts konungs Belgíu. Búist er við að Verhofstadt dragi sig út úr sviðsljósinu en taki þó sæti í öldungadeild belgíska þingsins.