Rússar brugga fyrsta kvennavodkann

MOSKVA (Reuters) Rússneski vodkaframleiðandinn Igor Volodin er fyrstur áfengisframleiðenda heimsins til að markaðssetja vodka sérstaklega ætlað konum en drykkurinn mun bruggaður með það fyrir augum að henta vel með salatinu eftir líkamsrækt. Þessi ódáinsdrykkur ber vörumerkið Damskaya-, eða kvennavodka og fer nú sigurför um landið enda eru skráðir áfengissjúklingar Rússlands tvær og hálf milljón en sérfræðingar segja að raunveruleg tala þeirra sé sjöfalt hærri og nái því yfir rúmlega tíunda hluta þjóðarinnar sem telur 142 milljónir.

Áfengissýki rússneskra kvenna er sérstakt vandamál innan heildarvandans en helsti markhópur Damskaya-vodkans eru menntaðar framakonur með fé milli handa og konur rússneskra milljónamæringa en hinar síðarnefndu ku slá flestum Rússum við þegar kemur að þorsta í göróttar veigar.

Útlit Damskaya-vodkaflösku á að höfða sterkt til veikara kynsins en flaskan er straumlínulaga með fjólubláum blæ. Þá hafa auglýsingar sem vekja athygli á þessari nýjung vakið verðskuldaða athygli á strætum og neðanjarðarlestarstöðvum Moskvu en þær sýna Damskaya-flösku íklædda hvítu pilsi sem golan feykir upp á við.

„Konur þurfa sinn eigin drykk," fullyrðir Volodin. „Í Moskvu eru bleikir leigubílar sem sérstaklega eru ætlaðir konum, við höfum vindlinga fyrir konur og af hverju höfum við þá ekki vodka handa konum?"

Nýja varan kemur með þrenns konar bragði, sítrus, vanillu og möndlu, auk einnar útgáfu án bragðefna sem ætluð er til hanastélsgerðar og fullyrðir framleiðandinn að drykkurinn sé algjörlega laus við öll hefðbundin aukaefni sem yfirleitt eru kveikjan að timburmönnum og öðrum neikvæðari fylgifiskum drykkju.