Yfir 4500 börn fæddust hér á landi í fyrra

4560 börn fæddust hér á landi í fyrra samkvæmt tölum sem Hagstofa Íslands birtir í dag. Þar kemur fram að um hafi verið að ræða tæplega 2360 drengi og um 2200 stúlkur. Börnunum fjölgaði eilítið frá árinu áður þegar þau reyndust 4415.

Frjósemi íslenskra kvenna var heldur meiri árið 2007 en nokkur síðustu ár en hún er reiknuð sem fjöldi lifandi fæddra barna á ævi hverrar konu . Árið 2007 mældist frjósemi hérlendis 2,1 barn á ævi hverrar konu, samanborið við 2,07 börn árið 2006 og 2,05 börn árið 2005.

Undanfarna tvo áratugi hefur frjósemi hérlendis verið í kringum tvö börn á ævi hverrar konu að meðaltali. Hámarki náði frjósemin í lok sjötta áratugarins og upphafi þess sjöunda en þá gátu íslenskar konur vænst þess að eiga 4,1 barn um ævina.

Næstmesta frjósemi í Evrópu

Frjósemi á Íslandi er nú hærri en annars staðar í Evrópu að Tyrklandi undanskildu. Þriðja mest var hún í Frakklandi, tvö börn á ævi hverrar konu árið 2006. Samanborið við önnur lönd í Evrópu var fæðingartíðni einnig há annars staðar á Norðurlöndunum. Af Norðurlöndunum var hún hæst í Noregi, 1,9 börn á ævi hverrar konu. Á Bretlandseyjum var fæðingartíðni svipuð og á Norðurlöndunum árið 2006, eða 1,84 í Bretlandi og 1,93 á Írlandi. Lægst var fæðingartíðnin innan álfunnar í löndum Austur-Evrópu árið 2006. Þar var hún á bilinu 1,24 til 1,55, lægst í Slóvakíu en hæst í Eistlandi.

Á sama tíma og frjósemi hefur minnkað hefur meðalaldur mæðra hækkað og konur eignast sitt fyrsta barn síðar en áður var. Frá byrjun sjöunda áratugarins og fram yfir 1980 var meðalaldur frumbyrja 22 ár en eftir miðjan níunda áratuginn og til dagsins í dag hefur meðalaldur frumbyrja hækkað og var 26,6 ár árið 2007.

Rétt rúmur þriðjungur þeirra barna sem fæddust árið 2007 voru fædd innan hjónabands sem er lágt hlutfall ef miðað er við önnur Evrópulönd. Hlutfall þeirra barna sem áttu foreldra í óvígðri sambúð var tæp 50 prósent og hlutfall þeirra sem áttu foreldra sem ekki voru skráðir í sambúð var um 14 prósent árið 2007 sem er svipað hlutfall og árið áður.