Stelpustrákurinn Raquela slær í gegn í Serbíu

"Þetta góða gengi kemur mér mjög á óvart," segir Ólafur Jóhannesson, leikstjóri myndarinnar The Amzing Truth About Queen Raquela, sem hlaut um helgina verðlaun fyrir afreksverk í þágu samtíma kvikmyndagerðar á kvikmyndahátíð í Serbía.

"Þessi litla mynd um hana Raquela svífur fallega á milli hátíða, þetta góða gengi kemur mér mjög á óvart," segir Ólafur. "Ég er afar glaður og hrærður yfir að hafa fengið að koma sögu hennar út til heimsins við þessar móttökur."

The Amazing Truth About Queen Raquela fjallar um stelpustrák frá Filipseyjum sem dreymir um að flytja til Vesturlanda og leita uppi draumaprinsinn. Myndin hefur hlotið fádæma lof og góða dóma og fékk Teddy-verðlaunin á kvikmyndahátíðinni í Berlín.

Myndin hlaut einnig tvenn verðlaun á kvikmyndahátíðinni NewFest í New York þar sem dómnefnd sagði hana "...hreinskilna, hvetjandi, fyndna, sorglega og vongóða, og slær ekki eina feilnótu."

Þrátt fyrir eintóma sigra er Ólafur hógvær. Hann segir gengi myndarinnar koma sér á óvart og tekur fram að kvikmyndagerð sé mikil vinna "...sem gengur ekki nema með smá heppni".

Og heppnin virðist svo sannarlega í liði með Ólafi og trúlega er ferðataskan orðin ansi þung miðað við verðlaunagripina sem hann hefur í farteskinu.