Elmander til Bolton

Johan Elmander hefur gengið til liðs við enska úrvalsdeildarfélagið Bolton frá Toulouse í Frakklandi.

Heiðar Helguson er einnig á mála hjá Bolton en þar sem báðir eru sóknarmenn verður að teljast að líkurnar á því að Heiðar fari til annars félags síðar í sumar hafi aukist með komu Elmander.

Hins vegar lætur Bolton norska sóknarmanninn Daniel Braaten af hendi en félagaskiptin eru talin vera virði um tíu milljóna punda.

„Þetta er leikmaður sem mun skora mörk fyrir félagið og skapa færi fyrir aðra leikmenn liðsins," sagði Gary Megson, stjóri Bolton.

Megson reyndi fyrst að fá Elmander í janúar síðastliðnum er félagið seldi Nicolas Anelka til Chelsea.