Jónína afeitrar Ísfirðinga

Jónína Benediktsdóttir verður með fyrirlestur um afeitrunarmeðferðir í Menntaskólanum á Ísafirði á fimmtudagskvöldið, að því er fram kemur á vef Bæjarins. Sérstök áhersla verður lögð á stólpípuferðirnar til Póllands, sem um 400 Íslendingar hafa farið í síðasta árið.

Fyrirlestur Jónínu er ókeypis, og geta áhugasamir aflað sér upplýsinga á vefsíðunni detox.is.

Á síðunni segir að meðferðin sem í boði er úti í Póllandi sé aldagömul og virki vel. „Þarna fæðast hugmyndir viðskiptamanna sem og sjúklingar finna leiðir til að takast á við erfiðleika sína,“ segir á síðunni. Meðal þess sem felst í meðferðinni eru langir göngutúrar og grænmetis- og ávaxtafæði, auk þess sem fólk fer daglega í infrarauðan klefa og saltherbergi til að hreinsa öndunarvegina af toxískum óþverra sem einkennir umhverfi nútímans.