Hringvegurinn lokaður í Borgarnesi

Hringvegurinn verður lokaður næstu þrjá mánuðina þar sem hann liggur í gegnum Borgarnes. Verið er að gera endurbætur á veginum og í staðinn eiga ökumenn að aka um merktar hjáleiðir sem hafa verið opnaðar.

„Framkvæmdirnar munu standa í um það bil þrjá mánuði en hluti vegarins verður þó opnaður fyrr," segir í tilkynningu frá Vegagerðinni. „Veginum var lokað nú í hádeginu í dag . Fyrir þá sem koma að sunnan, á norðurleið, er búið að loka Hringvegi við tengingu að Hyrnu og er nú farin hjáleið sem liggur til hægri framhjá Olís og kemur aftur inn á Hringveg neðan Vírnets. Þeir sem koma að norðan þurfa nú að beyja til vinstri inn á hjáleið neðan Vírnets. Búið er að loka fyrir tengingu frá Hyrnu og inn á Borgarbraut þannig að aðkoma er frá Brúartorgi. Framkvæmdir eru vel merktar og einnig hjáleiðir."

Vegfarendur eru beðnir að sýna aðgát og tillitsemi.