Byssusmiður minnir á Byssudaga

„Við vorum að kynna okkar vörur og það voru bæði safngripir þarna og margir aðrir áhugaverðir gripir," segir Jóhann Vilhjálmsson byssusmiður en nú standa yfir Byssudagar í Ellingsen.

Á laugardaginn mættu hátt í 600 manns í verslun Ellingsen og kynntu sér byssur. Ýmislegt var um að vera og léku Frethólkarnir blús fyrir viðstadda. Jóhann segir mikinn áhuga vera á byssum hér á landi og meðal annars var Dúi Landmark að kynna veiðiferðir til Senegal og Namibíu sem vöktu mikla athygli..

Jóhann hefur starfað sem byssusmiður í fimmtán ár en hann gekk í gegnum fjögurra ára nám í Belgíu. „Það er nú ekki mikill grundvöllur fyrir því að smíða og selja byssur hér á landi. En fólk er að koma með gamlar byssur sem þarf að gera við og vill oft á tíðum tala við fagmann," segir Jóhann.

Byssudagar standa nú yfir í Ellingsen en þar er hægt að fá fínar byssur á góðum afslætti fram að mánaðarmótum.