Veggjaldið í Hvalfjarðargöngum lækkar

26. febrúar 2008 10:28

Spölur, sem á og rekur Hvalfjarðargöngin hefur ákveðið að lækka veggjald fyrir staka ferð í Hvalfjarðargöngum núna um mánaðarmótin úr 900 krónum í 800 krónur.

Jafnframt lækkar veggjald í flestum áskriftarflokkum, en mismikið. Þannig lækkar gjald í þremur flokkum um nálægt 4% en í þremur öðrum flokkum um meira en 20%. Lægsta veggjald áskrifenda eftir breytinguna verður 230 krónur fyrir venjulegan fjölskyldubíl.

„Áætlað er að tekjur Spalar, sem á og rekur Hvalfjarðargöng, skerðist um 43 milljónir króna á ári vegna gjaldskrárbreytingarinnar," segir í fréttatilkynningu frá Speli. „Tilefni nýrrar gjaldskrár er væntanleg gildistaka tilskipunar Evrópusambandsins hér á landi varðandi hámarksafslátt vegna gjaldheimtu í veggöngum af ökutækjum sem eru 3,5 tonn eða meira og stunda samkeppnisrekstur," segir ennfremur.

„Ákvæði tilskipunarinnar ná til II., III. og IV. gjaldflokks Hvalfjarðarganga og ákvað stjórn Spalar að láta önnur ökutæki í sömu gjaldflokkum njóta líka lækkunarinnar. Áhrifa tilskipunarinnar gætir mismikið í nýrri gjaldskrá en allar breytingar eru til lækkunar og ákveðið var að lækka jafnframt gjald fyrir staka ferð og fyrir áskriftar- og afsláttarferðir í I. flokki, gjaldflokki fjölskyldubíla."

Í tilkynningunni er einnig bent á að veggjaldið í göngunum hefur lækkað um tugi prósenta frá upphafi, bæði að krónutölu og miðað við verðlag.

„Til gamans og fróðleiks má nefna eftirfarandi um veggjald og bensínverð:

• Stök ferð um göngin kostaði 1.000 krónur þegar þau voru opnuð í júlí 1998. Á sama tíma kostaði bensínlítrinn 75,40 krónur (verð með virðisaukaskatti og þjónustu á stöð).

• Stök ferð um göngin kostar 800 krónur frá og með 1. mars 2008. Bensínlítrinn kostar 143,80 krónur (miðast við 20. febrúar, verð með virðisaukaskatti og þjónustu á stöð).

Með öðrum orðum:

• Í júlí 1998 var veggjald fyrir staka ferð jafnvirði rúmlega 13 lítra af bensíni.

• Í marsbyrjun 2008 verður veggjaldið, miðað við óbreytt bensínverð, jafngildi 5,5 lítra af bensíni.

• Lægsta veggjald áskrifenda verður jafngildi 1,6 lítra af bensíni 1. mars 2008, miðað við bensínverðið 20. febrúar 2008."

Gjaldskrá Spalar má sjá í meðfylgjandi skjali.