Tarantúlan reyndi að sleppa

Tarantúlan sem lögregla á Suðurnesjum lagði hald á við húsleit í gærkvöldi, reyndi að flýja örlög sín hjá Heilbrigðiseftirliti Suðurnesja í morgun.

Víkurfréttir greina frá því að köngulóin hafi beðið örlaga sinna í stóru búri. Þegar Magnús Guðjónsson heilbrigðisfulltrúi brá sér í símann greip hún tækifærið og reyndi að komast á brott. Hún var hinsvegar gripin glóðvolg þar sem hún var komin hálf út um rimlana, og fargað með eitri í kjölfarið.

Eigandi tarantúlunnar hafði hana sem gæludýr á heimili sínu og fóðraði á músum.