Ótrúlegur sigur Aston Villa

Aston Villa vann í dag ótrúlegan 3-2 sigur á Everton í síðari leik dagsins í ensku úrvalsdeildinni.

Aston Villa var með 2-1 forystu þegar venjulegur leiktími var búinn en þá tókst Joleon Lescott að jafna metin fyrir Everton. En þá gerðist hið ótrúlega og Ashley Young skoraði sigumark Villa en báðir skoruðu þeir tvö mörk í leiknum. Steve Sidwell kom Aston Villa í 1-0 strax á fyrstu mínútu.

David Moyes, stjóri Everton, gerði eina breytingu á sínu liði frá síðasta leik. Victor Anichebe kom inn fyrir Yakubu sem á við meiðsli að stríða. Martin O'Neill, stjóri Aston Villa, gerði enga breytingu á sínu liði sem gerði markalaust jafntefli við Fulham um síðustu helgi.

Það var strax á fyrstu mínútu leiksins sem fyrsta markið kom. Ashley Young kom boltanum á James Milner sem lagði boltann fyrir Steve Sidwell. Hann gerði sér lítið fyrir og þrumaði knettinum í netið og skoraði glæsilegt mark.

Markið kom eftir aðeins 31 sekúndu en það er met í ensku úrvalsdeildinni á þessari leiktíð.

En leikmenn Everton voru fljótir að jafna sig á þessu og tókst að jafna metin skömmu síðar. Mikel Arteta tók aukaspyrnu inn á teig þar sem Leon Osman framlengdi boltann á Joleon Lescott sem skoraði af stuttu færi.

Everton komst nálægt því að ná yfirhöndinni í upphafi síðari hálfleiks er Marouane Fellaini skallaði boltann að marki af stuttu færi en Brad Friedel náði að verja í slána.

Aðeins nokkrum mínútum síðar náði Aston Villa aftur forystunni í leiknum er Ashley Young batt enda á laglega sókn liðsins með góðu skoti sem hafnaði í marki heimamanna.

Young fékk svo tækifæri til að auka forystu Villa en hann fór illa að ráði sínu er hann var svo gott sem sloppinn einn í gegnum vörn Everton.

Heimamenn börðust þó áfram og uppskáru á endanum jöfnunarmarkið og það í uppbótartíma. Joleon Lescott var þar að verki með glæsilegu skoti eftir sendingu Tim Cahill.

En þar með var leiknum ekki lokið. Mikel Arteta kom boltanum á Gabriel Agbonlahor strax eftir miðjuna. Hann gaf á Ashley Young sem sneri á Lescott og skoraði ótrúlegt sigurmark.