Bubbi kastaði upp á hvern skyldi senda heim

Birgir Sævarsson, 19 ára Reykvíkingur, var látinn fara úr Bandinu hans Bubba í kvöld. Birgir náði ekki að heilla kónginn með flutningi sínum á laginu Plush með Stone Temple Pilots en Birgir flutti lagið með íslenskum texta.

Jafnaldri Birgis, Vilhjálmur Örn Hallgrímsson, vermdi botnsætið ásamt Birgi í kvöld. Það kom eins og venjulega í hlut Bubba Morthens að skera úr um hver yrði sendur heim.

Bubbi var ekki viss um hvor ætti meira skilið að fá að halda áfram og greip því til þess ráðs að kasta lukkupeningnum sínum upp á það.

Lukkupeningurinn bjargaði Vilhjálmi en Birgir lýkur þátttöku sinni í þáttunum. Sex keppendur eru eftir í keppninni um hver verður söngvarinn í Bandinu hans Bubba.