Ellý spáir fyrir keppendum í Bandinu hans Bubba

Spákonan snjalla Ellý Ármannsdóttir rýnir í spilin fyrir keppendurna sem eftir standa í Bandinu hans Bubba. Hún spáir því að karlkyns söngvari verður rekinn heim í kvöld, stelpurnar séu öruggar fram í næstu viku amk. Hjálmar Már Kristinsson 05/08/1986 Ljón

Hjálmar er glæsilegur og hæfileikaríkur söngvari en sektarkennd og sjáfsvorkunn kæfa hæfileika hans, því miður. Honum finnst kannski að hann ráði við hvaða starf sem er en þessi drengur á ekki möguleika á sigursæti í þessari keppni. Barnslegt eðli og kæruleysi hans auðvelda honum örugglega þær áhættur sem hann mun taka í keppninni. Vilhjálmur Örn Hallgrímsson 13/03/1988 Fiskur

Þegar ég skoða Vilhjálm þá birtist mér sjaldséður glettnisglampi í augum hans. Bubbi og áhorfendur heima í stofu geta horft endalaust í augu Vilhjálms án þess að komast nokkurn tímann að hæfileikunum og leyndardómnum sem í djúpinu leynast. Vilhjálmur virðist vera hræddur við að opna sig upp á gátt sem er sorglegt því töfrar hans eru sem segull og það er ekki hægt annað en að heillast af þeim. Arnar Már Friðriksson 07/05/1986 Naut

Arnar Már er sárlega meðvitaður um sig en hann er listrænn, á því leikur enginn vafi.Hann er einn af þeim sem er aldrei hamingjusamari en þegar hann gerir lífið fegurra og það er alls ekki það sem Bubbi vill sjá í sigurvegara keppninnar. Það sem kemur í veg fyrir að Arnar fari með sigur af hólmi er vanafesta því hann er maður vanans. Ég ráðlegg honum að koma á breytingum í lífi sínu með því að brjóta vanann og reyna eitthvað nýtt og þá sér í lagi þegar kemur að söngnum. Thelma Hafþórsdóttir 29/12/1985 Steingeit

 

Thelma er ástríðufull og dulræn og það kann Bubbi vel að meta í fari hennar. Þótt stelpan felli líklega ekki mörg tár yfir fórnarlömbum Hírósíma þá hefur hún fyrir löngu ákveðið að hjúkra alltaf þeim sjúku og halda öllum góðum í kringum sig og þá sér í lagi kónginum sjálfum. Þess vegna fáum við að sjá mikið af Thelmu í keppninni þó hún standi ekki uppi sem sigurvegari. Hún er nefnilega of þrjósk og þegar hún verður of þrjósk þá vegnar henni illa.

 

Birgir Sævarsson 14/06/1988 Tvíburi

 

Birgir er allt of fljótfær og hann má ekki leyfa sér að taka fleiri áhættur. Hann hefur líka tilhneigingu til að dreifa kröftum sínum eins og óheftu kvikasilfri og það veit hann. Þess vegna ráðlegg ég honum að vanda sig með því að slaka á og hætta að flýta sér og leita stöðugt að fljótustu leiðinni við lagaval og flutning. Birgir er heillandi og óútreiknanlegur en það er eins og hann hafi gleymt að sannfæra sig um að hann sé ósigrandi. Því miður.

Eyþór Ingi Gunnlaugsson 29/05/1989 Tvíburi

 

Eyþór Ingi lifir fyrir augnablikið og það gerir hann að sigurvegara. Eyþór er greindur og fljótur að læra og hann vinnur meira eftir aðstæðum en ákveðinni reglu og skoðun hans á heiminum virðist vera mjög einföld: hann er miðjan sem allt snýst um. Akkúrat þannig þenkjandi fólk sigrar. Eyþór ætti að undirbúa sig fyrir maraþonskokk þegar kemur að frægð og frama því draumar hans eru um það bil að lifna við.

Birna Sif Margrétardóttir 18/10/1979 Vog

 

Birna hefur á sér hlið sem áhorfendur sjá ekki en umrædd hlið hennar er andstæða þeirrar glæsilegu konu sem að áhorfendum snýr, einskonar grátt þunglyndi eins og einkennir reyndar meirihluta þjóðarinnar. Þessi þyngsli tefja fyrir henni í keppninni og koma í veg fyrir að hún sigri en Birna er árásargjörn í eðli sínu og sterk og þá kosti ætti hún að nýta mun betur.