Watson segir Japan hafa skotið á sig

Paul Watson, leiðtogi samtakanna Sea Shepherd, segir að skotið hafi verið á sig í átökum samtakanna við japanska hvalveiðimenn í suðurhluta Kyrrahafs í morgun. Hann hafi hins vegar komist lífs af þar sem hann hafi verið í skotheldu vesti.

Í samtali við ástralska útvarpsstöð segir Watson að hann og félagar hans á bátnum Steve Irwin hafi kastað fýlubombum um borð í japanskt hvalveiðiskip en japanska strandgæslan hafi svarað með því að skjóta á Sea Shepherd menn. Þessu hafna sjávarútvegsyfirvöld í Japan og segjast hafa skotið hvellsprengjum sem notaðar séu í óeirðum og séu ekki eiginlegt vopn.

Watson og félagar hafa undanfarnar vikur elt uppi japönsk hvalveiðiskip og reynt að trufla veiðar þeirra. Í janúar voru tveir félagar í Sea Shepherd teknir höndum þegar þeir fóru um orð í japanskt skip en var síðar sleppt.

Sea Sherpherd samtökin eru alræmd á Íslandi fyrir að hafa sökkt hvalveiðiskipunum Hvalur sex og Hvalur sjö í Reykjavíkurhöfn í nóvember 1986 og unnið síðan skemmdir á Hvalstöðinni í Hvalfirði.