Hljóp út á flugbraut Heathrow

Miklar tafir urðu á flugi Heathrow flugvallar í einn og hálfan klukkutíma í dag eftir að maður með bakpoka hljóp í veg fyrir flugvél á norðurbraut vallarins. Gripið var til mikils öryggisbúnaðar og handtóku öryggisverðir manninn stuttu síðar. Grunur lék á að sprengja væri í pokanum en svo reyndist ekki vera.

Maðurinn mun hafa komist í gegnum girðingu sem umlykur völlinn rétt eftir klukkan tvö. Norðurbrautin var lokuð á meðan verið var að rannsaka vettvang, en hún opnaði aftur rétt fyrir klukkan fjögur. Einhverjar tafir eru enn á flugi en búist er við að flug komist í eðlilegt horf með kvöldinu.

Ekki er ljóst hvort atvikið tengist mótmælum vegna stækkunar vallarins og opnun fimmtu flugstöðvarbyggingarinnar á morgun.

Atvikið vekur upp áleitnar spurningar um öryggi á flugvellinum, en í síðasta mánuði komust mótmælendur inn á völlinn og hengdu borða með slagorðum á flugvél British Airways flugfélagsins.