Erkibiskup sem var rænt í Írak er látinn

Paulos Faraj Rahho kaþólskur erkibiskup í Írak sem var rænt í Mosul í síðasta mánuði fannst látinn í dag. Íraskur lögreglumaður og starfsmaður líkhúss staðfesta fréttir um að lík biskupsins hefði fundist grafið í jörðu nálægt Mosul þaðan sem honum var rænt.

Vatikanið segir að Benedikt páfi hafi verið ákaflega brugðið við fréttirnar og hann væri mjög leiður vegna dauða Rahho.

Erkibiskupnum var rænt stuttu eftir messu í Mosul 29. febrúar. Tveir aðrir sem voru með honum í för voru skotnir til bana. Samkvæmt heimildum SIR kaþólsku fréttastofunnar sögðu mannræningjarnir kirkjuyfirvöldum í Írak í gær að erkibiskupinn væri mjög veikur og seinna í gær að hann væri látinn.

Ekki er ljóst hvort biskupinn hafi dáið eðlilegum dauðdaga, eða hvort hann var myrtur. Enginn hefur lýst yfir ábyrgð á dauða hans.

Rahho er síðasta fórnarlamb mannræningja í röð mannrána á klerkum í Írak frá innrásinni í mars árið 2003.