Sex létust í sjálfsmorðsárás í Kabúl

Sex manns létust og að minnsta kosti 18 slösuðust í sjálfsmorðsbílasprengju í Kabúl höfuðborg Afghanistan í morgun. Sprengjunni var beint gegn bílalest nálægt alþjóðaflugvellinum. Embættismenn segja að bíll hafi keyrt upp að brynvörðum bíl bandalagshermanna á háannatíma í umferðinni og sprungið.

Fjórir bandarískir hermenn hlutu minniháttar meiðsl.

Vitni segja að bílilinn hafi gjöreyðilagst og bandarískar og afghanskar hersveitir hafi lokað veginum að flugvellinum, sem er vanalega notaður af erlendum herdeildum.

Talibanar segjast bera ábyrgð á árásinni en yfirlýsingin hefur ekki fengist staðfest.