Loftið í 100 borgum Bandaríkjanna er hættulegt fólki

Andrúmsloftið í yfir 100 borgum og bæjum í Bandaríkjunum er nú svo mengað að það er talið hættulegt fólki. Því hafa yfirvöld ákveðið að herða reglur um losun mengandi efna.

Þetta er í fyrsta sinn í yfir áratug sem ákveðið hefur verið að draga úr magni ozone í andrúmsloftinu í Bandaríkjunum en það veldur mengunarþoku sem hangir yfir borgum og bæjum. Suma daga er þokan svo þykk að hún sést vel með berum augum.

Um 4.000 andlát eru nú rakin beint til þessarar mengunnar á ári hverju í Bandaríkjunum og tugir þúsunda í viðbót eiga við öndunarerfiðleika að stríða.

Það er einkum útblástur frá bifreiðum og verksmiðjum sem nota olíu sem orkugjafa sem veldur þessari mengun.

Umhverfisverndarstofnun Bandaríkjanna hefur ákveðið að minnka skuli ozone úr 80 hlutum af milljón og niður í 75 hluta. Heilbirgðisyfirvöld vildu minnka þetta hlutfall enn meira en samtök iðnaðarins voru á móti þessari lækkun þar sem hún muni kosta meðlimi þeirra töluverð fjárútlát.

Umhverfisverndarstofnunin hefur reiknað út að kostnaðurinn fyrir iðnaðinn sé á bilinu 7 til 8 milljarðar dollara en á móti muni draga úr heilbrigðisútgjöldum af stærðargráðunni 19 milljarðar dollara.