Garðar: Dómarar hata ekki ÍA

Garðar Örn Hinriksson lætur engan bilbug á sér finna þrátt fyrir að hafa staðið í ströngu í leik KR og ÍA í gær.

„Ég stend við þetta allt saman og er ég búinn að skoða þetta í sjónvarpi," sagði Garðar í samtali við Vísi um ákvarðanir sínar í leiknum í gær.

Hann gaf þrjú rauð spjöld í leiknum. Vjekoslav Svadumovic og Bjarni Guðjónsson fengu báðir tvær áminningar og þar með rautt auk þess sem Guðjón Þórðarson, þjálfari ÍA, fékk að líta rautt í hálfleik.

Guðjón var ómyrkur í máli gagnvart Garðari og KSÍ eftir leik í gær. Það má smella á hlekk hér að neðan til að sjá viðtalið við Guðjón.

„Ég ætla ekki að svara orðum Guðjóns. KSÍ verður að gera það," sagði Garðar.

„En það hefur oft verið sagt um dómara að ef þeir þora ekki að fara alla leið þá eru þeir kallaðir gungur. Ef þeir fara alla leið og þora að taka á hlutunum þá eru þeir kallaðir athyglissjúkir."

„Dómarar fá yfirleitt neikvæða athygli þegar athyglin berst að þeim. Ég er alls ekki að sækjast eftir neikvæðri athygli. Ég er ekki í þessu til að komast í sviðsljósið heldur til að vinna mitt starf og sinna því sem mér finnst gaman að gera."

Eftir að Guðjón fékk að líta rauða spjaldið kom hann sér fyrir ásamt áhorfendum sem stóðu stutt frá varamannaskýli ÍA. Garðar Örn stöðvaði fljótlega leikinn og rak hann lengra í burtu. Einnig hótaði hann því að flauta leikinn af. Guðjón sagði í viðtali eftir leikinn að hann hefði séð eftir því að láta ekki reyna á það.

„Ég hef klárlega það leyfi til að flauta leikinn af," sagði Garðar. „Þjálfari í banni má ekki standa þarna þar sem þjálfarinn stóð. Þetta er bannað, hvort sem það er þjálfari eða leikmaður sem hefur fengið rauða spjaldið. Þá mega þeir ekki vera þarna, þó þeir séu í kringum áhorfendur."

ÍA hefur nú fengið að líta rauða spjaldið sex sinnum í sumar. Það liggur því beinast við að spyrja Garðar hvort dómarar hati ÍA.

„Dómarar hata ekki ÍA frekar en KR, Val, Þrótt, Stokkseyri eða önnur lið. Ef við gerðum það gætum við ekki sinnt okkar störfum. Ég veit ekki til þess að neinn dómari hati eitthvað ákveðið félag."

Og hann treystir sér til að dæma aftur leik með ÍA í næstu umferð.