Bankastjóri vildi í barnvænna umhverfi

Sigurjón Þór Árnason bankastjóri Landsbankans flutti á dögunum ásamt börnum og buru úr miðbænum og fjárfesti í húsi í Granaskjólinu.

„Þó það sé gott að búa í miðbænum þá er heppilegra að eiga heima rétt fyrir utan hann þegar börnin eldast og byrja að leika sér úti," segir Sigurjón.

Fjölskyldan bjó áður á Bjarnastígnum, sem Sigurjón segir eina fallegustu götu bæjarins. Hann vildi ekki alveg sleppa hendinni af húsinu, og seldi það því ekki, en foreldrar hans búa þar núna.

„Í mínum huga er Reykjavík miklu minni en hún raunverulega er" segir Sigurjón, sem gat ekki hugsað sér að flytja í eitt af nýrri úthverfum borgarinnar. „Mér finnst þessi gömlu grónu hverfi mikið skemmtilegri," segir Sigurjón. Honum hugnast ekki mörg nýrri hverfin þar sem eru ýmist bara blokkir eða einbýlishús, og segir skemmtilegra þegar það sé blanda af húsastærðum. „Hér í Vesturbænum er blanda af blokkum, 3-4 íbúða fjölbýlum og einbýlishúsum. Mannlífið er skemmtilegra þegar það er þessi fjölbreytileiki."