Brúðgumi Baltasars frumsýndur

Brúðguminn, nýjasta kvikmynd Baltasars Kormáks verður frumsýnd í Háskólabíói á miðvikudag. Myndin er systurverk leiksýningarinnar Ívanovs, eftir Anton Tsjekov, sem er sýnd í Þjóðleikhúsinu, og standa sömu leikarar og listrænu stjórnendur að verkefnunum tveimur.

Með hlutverk í myndinni fara Hilmir Snær Guðnason, Laufey Elíasdóttir, Margrét Vilhjálmsdóttir, Ólafur Egilsson, Þröstur Leo Gunnarsson, Ólafía Hrönn Jónsdóttir, Ólafur Darri Ólafsson, Jóhann Sigurðarson og Ilmur Kristjánsdóttir.

Myndarinnar er beðið með nokkurri eftirvæntingu enda hafa síðustu myndir Baltasars notið gríðarlegra vinsælda. Skemmst að minnast landvinninga hans vestanhafs, en bandarískt kvikmyndafyrirtæki keypti nýlega réttinn til að endurgera síðustu kvikmynd Baltasars, Mýrina.

Myndbrot úr Brúðgumanum má sjá á vefnum kvikmyndir.is