Garðar Thor í vinsælum breskum sjónvarpsþætti

Garðar Thór Cortes kemur fram í sjónvarpsþætti Alan Titchmarsh á sjónvarpsstöðinni ITV í Bretlandi í dag. Þetta er í annað skipti sem Garðar er gestur í þættinum, en þegar hann kom í þáttinn til Alans í haust heillaðist þáttastjórnandinn upp úr skónum af tenórnum íslenska. Alan líkir Garðari fullum fetum við Pavarotti, og má segja að hann sé einn mesti aðdáandi Garðars í breskum fjölmiðlum.

Í síðasta mánuði söng Garðar fyrir Karl Bretaprins og eiginkonu hans Camillu, við sjósetningu Queen Victoria. Þar var Alan þessi líka gestur, og bauð Garðari í kjölfarið að borða kvöldmat með sér og eiginkonu sinni um borð í skipinu.

Alan hélt lengi vel úti virtum og mjög vinsælum sjónvarpsþáttum um breska náttúru og garðrækt á BBC. En hefur núna fært sig um set yfir á ITV þar sem hann heldur úti almennum spjallþætti og er þátturinn á dagskrá alla virka daga milli 15:00 og 16:00.