Fleiri konur en karlar smituðust af HIV í fyrra

Þrettán einstaklingar greindust með HIV-smit á síðasta ári samkvæmt því sem fram kemur í nýjasta hefti Farsóttarfrétta frá Landlæknisembættinu. Þá greindust óvenjumargir með lifrarbólgu B á síðasta ári.

Líklegt var talið að smit tengdist fíkniefnaneyslu í æð í sex tilfellum. Í fjórum tilfellum var smit talið tengjast kynmökum gagnkynhneigðra og í þremur tilvikum kynmökum samkynhneigðra.

Af þeim sem greindust á árinu voru sjö konur en þetta er í fyrsta sinn sem fleiri konur greinast með HIV-smit en karlar á Íslandi. Vakin var athygli á því í Farsóttafréttum í nóvember 2007 að óvenju mörg HIV-tilfelli tengdust fíkniefnaneyslu og líkur leiddar að því að um hópsýkingu gæti verið að ræða.

Veirufræðideild Landspítalans hefur unnið að samanburði HIV-stofna sem greindust á árinu 2007. Niðurstöður þessara rannsókna sýna að einungis tveir einstaklingar sem sprautuðu sig reyndust vera með sama veirustofn. Þessar niðurstöður benda því tilað ekki hafi verið um eiginlegahópsýkingu að ræða meðal fíkniefnaneytenda á árinu 2007.

Landlæknir segir enn fremur að áfram verði fylgst náið með útbreiðslu HIV-smits meðal fíkniefnaneytenda því að nái HIV-smit fótfestu í þessum áhættuhópi má búast við stóraukinni útbreiðslu sjúkdómsins hér á landi.

Fjörutíu og fimm greindust með lifrarbólgu B

Óvenju margir greindust með lifrarbólgu B á árin 2007, eða 45 manns. Um helmingur þeirra voru innflytjendur og vitað var um átta sem höfðu sprautað sig með fíkniefnum. Síðast gekk yfir faraldur meðal fíkniefnaneytenda á árunum 1989-1991. „Mikilvægt er að bjóða fíkniefnaneytendum, sem ekki hafa smitast af lifrarbólgu B, bólusetningu gegn sjúkdómnum til að koma í veg fyrir nýjan faraldur í þessum hópi," segir í Farsóttarfréttum.