Sigríður segir Pálma enn beita blekkingum

Sigríður Margrét Oddsdóttir, framkvæmdastjóri Skjá miðla ehf., sem reka SkjáEinn er ósátt við túlkun Pálma Guðmundssonar, sjónvarpsstjóra Stöðvar 2 á áhorfstölum sem Capacent birti um daginn. Í viðtali við Vísi fyrr í dag sagði Pálmi að bilið á milli stöðvanna væri að breikka, en það segir Sigríður rangt.

„Á Vísi.is í dag, sem tilheyrir 365 miðlum ehf., birtist viðtal við Pálma Guðmundsson, sjónvarpsstjóra Stöðvar 2, þar sem hann viðurkennir að áhorf á SkjáEinn hafi aukist frá því sem áður þekktist en hann segir jafnframt: „Stöð 2 er að taka stærri sneið af kökunni."," segir í tilkynningu frá Sigríði. „Skjá miðlar ehf. vilja taka fram að þetta er enn og aftur rangtúlkun hjá Pálma. Þessi munur sem hann vísar til er nánast óbreyttur á milli mælinga og innan skekkjumarka. Þegar gögnin sem birt hafa verið af Capacent Gallup eru skoðuð betur kemur svo í ljós að bilið milli Stöðvar 2 og Skjás Eins er ekki einungis óbreytt frá því í fyrra heldur hefur það minnkað töluvert á milli stöðvanna frá því á árunum 2005 og 2006."

„Það er jákvætt að Pálmi viðurkenni að áhorf á SkjáEinn hafi aukist en það er hins vegar ekki rétt hjá honum þegar hann segir að bilið á milli stöðvanna sé að breikka," segir ennfremur. „Pálmi heldur því áfram að fara með rangt mál," segir Sigríður Margrét Oddsdóttir framkvæmdastjóri Skjá miðla ehf."

„Það ber jafnframt að taka fram að SkjárEinn hefur ekki verið með fréttastofu um margra ára bil og er ekki að keppa um heildaráhorf. SkjárEinn er að keppa á kjörtíma, eftir kl. 20 á kvöldin á meðal Íslendinga undir 50 ára," segir Sigríður að lokum.