Stofna ný samtök gegn kvótakerfinu

34 sjómenn hafa gengið í ný samtök sem stofnuð voru á Akureyri í gær. Þeir undirbúa aðgerðir gegn óréttlátu kvótakerfi og munu jafnvel róa í trássi við lög.

Það var mikill hugur í þeim smábátasjómönnum sem komu saman á Hótel KEA í gær og stofnuðu Framtíðina, samtök sjálfstæðra í sjávarútvegi. Segja má að samtökin séu klofningssamtök frá Landssambandi smábátasjómanna og er mikil þörf á nýja félagsskapnum segir formaðurinn, Hallgrímur Guðmundsson.

Hann segir félagsmenn ekki telja sig eiga lengur samleið með Landssambandi smábátasjómanna því það hafi villst af leið og sé farið að verja kvótastefnuna. Eina sem smábátasjómenn geti gert sé að hópast saman og fara að láta raddir sínar heyrast því verið sé að drepa byggðirnar og því ætli félagið að snúa við.

Sjómenn af öllu landinu eru í hinu nýja félagi og ætla menn ekki að sitja aðgerðalausir lengi að sögn formannsins. Aðspurður hvort félagsmenn muni róa þegar þeim sýnist mælir Hallgrímur ekki með því en segir að menn muni sjá það á næstu dögum hvernig félagið láti til sín taka.