Verðlaunamynd Berlínarhátíðarinnar á leið til landsins

Brasilíska myndin Tropa De Elite vann Gullbjörninn, aðalverðlaunin á kvikmyndahátíðinni á Berlín, óvænt um helgina. Hún skaut þar með fjölda sterkra mynda ref fyrir rass, þar á meðal There Will Be Blood, sem er tilnefnd til átta Óskarsverðlauna.

Íslendingar geta borið sigurmyndina augum innan skamms, en kvikmyndaklúbburinn Græna ljósið tryggði sér sýningarréttinn á myndinni nokkru fyrir kvikmyndahátíðina í Berlín. Í tilkynningu frá Græna ljósinu segir að tilkynnt verði um frumsýningardaginn innan skamms, og kvikmyndaunnendur þurfi ekki að bíða hennar lengi.

Tropa De Elite hefur vakið gríðarlega athygli í heimalandi sínu, en hún fjallar um sérsveit sem hefur það að markmiði að berjast við harðsvíruðustu eiturlyfjabaróna verstu fátækrahverfa Brasilíu.