Júróvisjónaðdáendur fúlir yfir grínatriðum

Mikil reiði ríkir nú á meðal gallharðra Júróvisjón-aðdáenda vegna fjölda „grínatriða" í keppninni þetta árið. Írland sendir sem frægt er orðið kalkúninn Dustin, Eistland valdi þrjá þéttvaxna miðaldra karlmenn og bikiniklæddar klappstýrur, nágrannar þeirra Lettar senda hóp sjóræningja, og eins og til að reka naglann í kistu hinnar hnignandi keppni ákváðu Belgar í gær að bjóða upp á lag á bulltungumáli.

Leiðari Júróvisjón síðunnar Esctoday fjallar um málið og býður lesendum sínum að tjá sig um málið í kosningu á síðunni. Þar segir að í mörgum löndum sé litið á svo á að þessi atriði skemmi trúverðugleika Júróvisjón sem alvöru tónlistarkeppni. Þó viðurkennir leiðarahöfundur að grínatriðin veki yfirleitt meiri athygli en þau hefðbundnari. Þannig hafi kalkúnninn Dustin hinn írski orðið fréttamatur í Bretlandi og meira að segja ratað í fréttatíma bandarísku fréttastöðvarinnar CNN.