Tældu Heath Ledger með kókaíni

Dómsmál sem þingfest var í gær gegn umboðsskrifstofu ljósmyndara í Hollywood segir að tveir paparazzi ljósmyndarar þeirra hafi útvegað leikaranum Heath Ledger kókaín. Þetta hafi þeir gert í þeim tilgangi að taka leynilega af honum myndir þar sem hann var að taka efnið inn á hótelherbergi fyrir tveimur árum.

Í málinu kom fram að myndskeið af fundinum hafi verið selt til fjölmiðla víða um heim, meðal annars í Bretlandi og í heimalandi hans, Ástralíu.

Brot af myndbandinu var sýnt á bandarískum sjónvarpsstöðvum nokkrum dögum eftir dauða hans í janúar. Því var harðlega mótmælt í Hollywood.

Í dómsskjölum kemur fram að myndbandið hafi gefið af sér meira en eina milljón dala (tæpar 74 milljónir) í tekjur sem ætti að vera ólöglegt samkvæmt lögum í Kaliforníu. Þau segja að paparazzi ljósmyndarar verði að skila hagnaði sem fenginn er af ólöglegri háttsemi.

Ledger er best þekktur fyrir hlutverk sitt sem samkynhneigður kúreki í myndinni Brokeback Mountain. Hann var tilnefndur til Óskarsverðlauna fyrir það. Hann lést 22. janúar eftir að hafa tekið of stóran skammt af lyfjum í íbúð sinni í New York.

Splash News & Picture umboðsskrifstofan er ákærð fyrir að borga fyrir kókaín sem mun hafa verið notað árið 2006 af tveimur ljósmyndurum á hennar vegum til að tæla Ledger þannig að þeir gætu tekið af honum myndir. Fréttir höfðu verið birtar af ströggli hans við eiturlyfjaneyslu.

Atvikið átti sér stað 29. janúar árið 2006 á Marmont hótelinu á Sunset Strip í Hollywood. Þar var Ledger í samkvæmi eftir að hafa unnið verðlaun Samtaka leikara í Bandaríkjunum fyrir hlutverk sitt í Brokeback Mountain.