Upprunalegir eigendur komnir við stjórnvölinn á Óliver

Örum breytingum á rekstri vinsælasta skemmtistaðs Íslands, Óliver, er lokið. Staðurinn er kominn aftur í hendur stofnenda sinna, Arnars Þórs Gíslasonar og Loga Helgasonar eftir að hafa flakkað á milli rekstraraðila undanfarna mánuði.

Reksturinn var um tíma í höndum Ragnars Magnússonar, þá Baldvins Samúelssonar og loks Ásgeirs Davíðssonar, sem kenndur er við Goldfinger, og sonar hans. Allir þessir aðilar reyndu að kaupa Óliver en það reyndist þeim of stór biti.

Arnar og Logi hafa því tekið aftur við keflinu og hafa fengið til liðs við sig þá Atla Ottesen og Loft Loftsson.

Arnar segir að þeir félagar séu himinlifandi yfir því að vera komnir með Óliver aftur í hendurnar. "Enda vitum við hvað þetta dýr getur," segir hann léttur í bragði.

Ekki er von á róttækum breytingum á rekstri Ólivers að sögn Arnars. "Við munum gera þetta jafnvel og við erum vanir að gera," segir hann og bætir við að fastagestir þurfi engu að kvíða.