Hundrað almennir borgarar féllu í bardögunum í Tsjad

Að minnsta kosti hundrað almennir borgarar féllu í átökum skæruliða og stjórnarhermanna í Afríkuríkinu Tsjad um síðustu helgi. Samtökin Læknar án landamæra halda þessu fram og segja einnig að um 700 manns hafi slasast í átökunum.

Rauði krossinn segir tölu slasaðra enn hærri og búist er við því að tala látinna eigi eftir að hækka á næstu dögum. Samtökin segja að allt í allt hafi um 160 manns fallið í bardögunum.

Forseti Tsjad lýsti í dag yfir fullnaðarsigri yfir skæruliðunum sem reyndu að steypa honum af stóli um helgina og segja sjónarvottar að í dag hafi herþyrlur á vegum stjórnarinnar gert loftárásir á búðir skæruliðanna fyrir utan höfuðborgina. Valdarán hafa verið tíð í Tsjad undanfarna áratugi en langt er síðan svo margir hafa fallið. Forsetinn segir að um málaliða hafi verið að ræða og ásakar hann stjórnvöld í Súdan um að hafa staðið á bakvið valdaránstilraunina.