Viðgerð á öðrum spenni Sultartangastöðvar lokið

Viðgerð á öðrum spenni Sultartangastöðvar er lokið eftir því sem fram kemur í tilkynningu Landsvirkjunar og verður viðgerð á hinum lokið í lok apríl.

Eins og fram kom í fjölmiðlum á sínum tíma biluðu báðir vélaspennar stöðvarinnar með skömmu millibili í lok síðasta árs. Má bilunina að líkindum rekja til eldinga.

Vegna langs afhendingartíma á varahlutum í spennana var gripið til þess ráðs að flytja varahluti frá spenninum sem bilaði á aðfangadag yfir í spenninn sem bilaði 1. nóvember. Viðgerðin fór fram á staðnum og önnuðust starfsmenn Landsvirkjunar og Landsnets verkið undir leiðsögn sérfræðinga hins franska framleiðanda spennanna.

Verkið gekk vel í alla staði og er Sultartangastöð farin að framleiða rafmagn á ný en með hálfum afköstum eftir að hafa verið stopp síðan á aðfangadag. Þrátt fyrir þessa miklu bilun var nánast full afhending á ótryggðu rafmagni og afgangsorku til viðskiptavina Landsvirkjunar meðan á viðgerð stóð.

Með raforkuframleiðslu í Sultartangastöð á ný eftir tveggja mánaða hlé eykst öryggið í raforkukerfinu verulega, segir Landsvirkjun.