Stofna hlutafélag um REYST orkuskóla

Rektorar Háskóla Íslands og Háskólans í Reykjavík skrifuðu í dag undir hluthafasamkomulag vegna REYST orkuskólans ásamt stjórnarformanni Orkuveitu Reykjavíkur.

Skólinn hefur starfsemi í haust og verður hann til húsa í höfuðstöðvum Orkuveitu Reykjavíkur en kennsla fer einnig fram í háskólunum tveimur. Samkvæmt samkomulaginu verður hlutafélagið í jafnri eigu háskólanna tveggja og Orkuveitunnar.

Skráning nemenda á fyrsta starfsár skólans stendur yfir og hefur fjöldi fyrirspurna borist víða að úr veröldinni eftir því sem segir í tilkynningu frá Orkuveitu Reykjavíkur. Stjórn REYST er skipuð Önnu Skúladóttur, sem er fulltrúi Orkuveitunnar og stjórnarformaður, Gunnar Guðna Tómassyni frá HR og Magnúsi Þór Jónssyni frá HÍ.

REYST er skammstöfun á heiti skólans, sem fullu nafni heitir Reykjavik Energy Graduate School of Sustainable Systems. Þar mun íslenskum og erlendum stúdentum standa til boða framhaldsnám á háskólastigi í orkuvísindum þar sem grunnþættirnir eru náttúra, tækni og markaður. Háskólarnir tveir eru faglegir bakhjarlar skólans og munu nemendur einnig njóta faglegrar þekkingar innan Orkuveitu Reykjavíkur auk þess sem fyrirtækið er fjárhagslegur bakhjarl skólans.

„Aðaláhersla verður lögð á þau svið þar sem Íslendingar hafa samkeppnisforskot. Boðið verður upp á rannsóknatengt meistaranám og doktorsnám auk námskeiða fyrir sérfræðinga og stjórnendur fyrirtækja í orkugeiranum og fjármálastofnunum sem og fyrir opinberar stofnanir innan lands og utan. Megináhersla í meistaranáminu verður á jarðhitavísindi til að byrja með og við REYST verða kennd 15 sérsniðin námskeið á sviði orkuvísinda og að auki velja nemendur meistaranámskeið við HÍ og HR. Námið er þverfaglegt þar sem áhersla getur verið á verkfræði, viðskiptafræði eða jarðvísindi," segir í tilkynningu.