Siggi Stormur heldur tryggð við Land Rover

„Þetta eru svona viss vonbrigði. Þegar maður ekur um á Land Rover þá er maður svo sannfærður um að maður sé á eðal breskum bíl með allri þeirri sérvisku og sjarma sem því fylgir," sagði Sigurður Þ. Ragnarsson, þegar fregnir af kaupum hins indverska Tata Motors á Land Rover voru borin undir hann.

Siggi Stormur er sem kunnugt er mikill aðdáandi Land Rover bíla, og fær sér nýjan slíkan á níu mánaða fresti. Hann hefur þó ekki áhyggjur af því að gæðum þeirra hraki þó eignarhaldið flytjist til. „Þeir eru að þessu til að græða pening og ætli þeir sér það mega þeir ekki slaka á gæðakröfunum," segir Siggi, sem vonar að passað verði upp á gæðastaðalinn á þessari fornfrægu bresku framleiðslu.

Eignarhald á Land Rover hefur flakkað nokkuð í áranna rás. BMW keypti merkið af British Aerospace árið 1994 sem seldi það sex árum síðar til Ford, sem aftur seldi það áfram til Tata fyrir skemmstu. Hringlið hefur valdið Sigga nokkrum áhyggjum. „Ég hef haft vissar áhyggjur af þessu kennitöluflakki, en svaf þó vel," segir Siggi kíminn, og bætir við að það hafi verið mikill léttir þegar hann komst að því að díselvélin í bílnum væri bresk en ekki þýsk.

Siggi reiknar fastlega með að skipta Land Rovernum sínum út fyrir annan sömu tegundar þegar hann er kominn á aldur. „Minn Land Rover tími er ekki liðin, enda búinn að eiga fimm slíka bíla. Ég er í skýjunum yfir Land Rover, það hefur aldrei verið framleiddur betri bíll. Ef fólk heldur öðru fram, eru einhver skrítin sjónarmið sem liggja þar að baki."