Hlýddu á tónleika um MAXIMÚS MÚSÍKÚS

700 leikskólabörn hlýddu hugfangin á tónleika Sinfóníuhljómsveitar Íslands í morgun um hann MAXÍMÚS MÚSÍKÚS, sem er sögupersóna í nýútkominni bók eftir Hallfríði Ólafsdóttur flautuleikara hljómsveitarinnar.

Valur Freyr Einarsson leikari var sögumaður á tónleikunum og sagði hann frá ævintýrum MAXÍMÚSAR MÚSÍKÚSAR í takt við ein þekktustu tónverk tónlistarsögunnar á borð við Boléro og fimmtu sinfóníu Beethovens. Börnin sátu grafkyrr í sætum sínum á meðan á tónleikunum stóð eða í um 45 mínútur.

Rúmlega þrjú þúsund leikskólabörn fá að hlýða á ævintýri MAXÍMÚSAR næstu daga en tónleikar fyrir almenning verða næsta laugardag klukkan tvö.