Litríkir síðustu dagar hjónabands Seans Penn og spúsu

Sean Penn og verðandi fyrrverandi eiginkona hans hafa verið þögul sem gröfin um hvað olli því að þau ákváðu að skilja eftir ellefu ára hjónaband.

Star tímaritið bandaríska greinir frá síðustu helgi leikaranna saman í nýjasta tölublaði sínu. Samkvæmt blaðinu fóru hjónin í það sem átti líklega að vera rómantísk ferð til Lake Tahoe í Kaliforníu. Þau skráðu sig inn á hótel, en athygli vakti að Sean bað um tvær svítur, eina fyrir hvort þeirra.

Blaðið hefur það eftir starfsmanni hótelsins að Sean hafi vart hitt konu sína á meðan þau dvöldu þar. Þegar henni fór að leiðast einveran fór hún yfir í svítuna til hans, þar sem hún fann hann dauðadrukkinn með tveimur rússneskum stúlkum.

Sean lét sér að sögn hvergi bregða og hélt áfram að skemmta sér, en Robin lét sig hverfa. Þegar hótelstarfsmaður spurði hann síðar um kvöldið hvar eiginkonan væri svaraði hann einfaldlega: „Hverjum er ekki sama?"