Aðeins einn nýr leikmaður hjá United í sumar

Sir Alex Ferguson, knattspyrnustjóri Manchester United, býst við því að kaupa aðeins einn leikmann til félagsins þegar að félagaskiptaglugginn opnar á nýjan leik á miðnætti í kvöld.

„Ég held að við munum ekki kaupa meira en einn leikmann," sagði Ferguson. „Við erum með eitt eða tvö mál í skoðun."

United hefur helst verið orðað við Dimitar Berbatov hjá Tottenham og Roque Santa Cruz hjá Blackburn. Þar að auki er talið líklegt að Louis Saha sé á förum frá félaginu en hann hefur átt í viðræðum við Roma á Ítalíu.

Þá er enn óljóst hvað verður um Cristiano Ronaldo sem hefur sagt að hann vilji fara til Real Madrid. Forráðamenn United hafa þó ávallt sagt að hann sé ekki til sölu.

Fyrir ári síðan eyddi United meira en fimmtíu milljónum punda er félagið keypti meðal annarra Owen Hargreaves, Anderson, Carlos Tevez og Nani.