Hundruð farþega strandaglópar á Heathrow

Útlit er fyrir að breska flugfélagið British Airways þurfi að aflýsa nærri hundrað flugferðum frá nýrri flugstöð Heathrow-flugvallar í Lundúnum um helgina vegna vandræða með innritun farþega og skráningu farangurs.

Um hundrað flugferðum var aflýst í gær og í fyrradag en nýja flugstöðin - sú fimmta á Heathrow - var tekin í notkun á fimmtudaginn. Fyrsta daginn hrundi innritunarkerfið og síðan þá hafa mörg hundruð farþegar verið strandaglópar á vellinum.

Með tilkomu nýju flugstöðvarinnar átti að losa um hinar flugstöðvarnar fjórar og draga úr alræmdri örtröð við innritanir, vegabréfaeftirlit og öryggiseftirlit. British Airways er eina flugfélagið sem notar fimmtu flugstöðina.