Í geitarhúsi að leita ullar?

Stuðningsmenn Jóhönnu Þorvaldsdóttur geitabónda á Háafelli í Hvítársíðu hafa hafið undirskriftasöfnun til stuðnings því að henni verði veittur viðunandi fjárstyrkur til að koma upp aðstöðu til ræktunar og hirðingar geita sinna. Jóhanna hefur barist í bökkum með þær 116 fullvöxnu geitur sem bú hennar telur auk hátt í 90 kiðlinga sem litið hafa dagsins ljós nú á vordögum.

„Vonandi er búið að taka ákvörðun um að gera eitthvað til að bjarga stofninum, þverpólitísk tillaga um það var samþykkt á þingi. Við erum aðilar að Ríósáttmálanum sem segir að við megum ekki láta stofna deyja út svo ríkið hlýtur að bera ábyrgð á því," útskýrir Jóhanna.

Kollótt er ekki litaafbrigði

Hún hefur ræktað geitur í 18 ár og hefur meðal annars í bústofni sínum síðustu kollóttu geiturnar sem fyrirfinnast hér á landi. Á kollóttum geitum vaxa ekki horn en útbreiddur misskilningur er að kollótt sé litaafbrigði. Þau eru þó einnig til fágæt hjá Jóhönnu og nefnir hún gulgolsóttar og gulflekkóttar geitur.

Bændasamtök Íslands vinna nú að því fyrir Jóhönnu að útvega styrki til að byggja það geitarhús sem þarf en það mun kosta um 50 milljónir króna. „Þegar hægt er að byggja eina stúku við fótboltavöll fyrir 900 milljónir þá held ég að það hljóti að vera hægt að finna 40 - 50 milljónir í eitt hús til að varðveita dýrastofn," segir Jóhanna, ómyrk í máli.

Árni Jósteinsson, nýsköpunarráðgjafi Bændasamtakanna, segir það rétt að samtökin hafi verið að aðstoða Jóhönnu, meðal annars með því að útbúa viðskiptaáætlun og setja í gang ýmis umsóknarferli. Þegar hafi fengist styrkur til verksins frá erfðanefnd og að auki sé landbúnaðarráðuneytið með málið til skoðunar.

„Öll viðbrögð byrja alltaf á jákvæðum nótum svo ég er fullur bjartsýni," segir Árni og bætir því við að hann sé þess nokkuð viss að málið nái að lokum alla leið.

Engin afstaða enn

Hjá Sigurgeiri Þorgeirssyni, ráðuneytisstjóra í landbúnaðarráðuneytinu, fengust þær upplýsingar að engin afstaða hefði verið tekin til þess enn hvort unnt yrði að styrkja Jóhönnu með einhverjum hætti.

„Nú er í endurskoðun svokallaður búnaðarlagasamningur sem er milli Bændasamtakanna og ráðuneytisins og ég á von á að þetta ákveðist á þeim vettvangi. En ég get hvorki sagt af eða á um það núna. Ef mögulegt yrði að hlaupa undir bagga með henni yrði það undir þeim formerkjum að verið væri að vernda geitastofninn," sagði Sigurgeir.