Neyðarfundur hjá ríkisstjórn Hollands vegna umdeildrar Kóranmyndar

Óttast er að reiðialda rísi í ríkjum múslíma á næstunni í kjölfar frétta af því að umdeild mynd hollensks stjórnmálamanns um Kóraninn var sett inn á Netið í gær.

Ríkisstjórn Hollands var kölluð saman til neyðarfundar og dagskrá í hollensku sjónvarpi var breytt eftir greint var frá því að umdeild kvikmynd hollenska stjórnmálamannsins Geert Wilders, sem nefnist Fitna, hefði verið sett á Netið í gær. Þar er Kóraninn, hið helga rit múslíma, gagnrýnt harkalega og múslímar hvattir til þess að rífa ákveðna kafla úr bókinni.

Wilders hafði ítrekað frestað því að sýna myndina enda ljóst að hún yrði mjög umdeild. Jan Peter Balkenende forsætisráðherra sagðist vona að myndin myndi ekki kalla á mótmæli í löndum múslíma en engu að síður er óttast að svipuð reiðialda gangi yfir og þegar skopmyndir af spámanninum Múhameð birtust í dönskum miðlum fyrir um tveimur árum.